Hoc opus anno 1896 ab Renato Worms, qui erat unus ex initiatoribus sociologiae postmodum multum excultae, Latine scriptum et editum paene per integrum saeculum difficultur vel vix accessibile erat.

Hunc librum diligentissime recognitum et recensítum D.rix Sigrides Albert in studiorum universitate Saravipontana studia sociologica studiaque cultus civilis Europaei percolens accuratissime edidit versionemque Theodiscam considerate factam singulis paginis sinistris in paginis dextris addidit (pp. 10-161). Eadem indicem materiarum et capitulorum atque prooemium introductorium Theodisce scriptum textui ipsi praemisit (pp. 3-8) eidemque adnotationes grammaticales et stilisticas subiunxit (pp. 163-166) atque indicem personarum (pp. 167-168) et denique rerum indicem satis amplum (pp. 169-176).

Quo opere textus Latinus disciplinae recentioris et modernae, cuius nomenclatio tunc temporis nondum omni ex parte satis stabilita erat, dilucide exhibetur commodissimeque praebetur difficultatibus quibusdam loquelaribus circumspecte scienterque dissolutis. Spectat igitur hoc opus feliciter propositum tam ad primigenias investigationes sociologicas quam ad usum linguae Latinae in modernis quoque lucubrationibus et quaestionibus perutiliter percipiendum.

Qui liber bilinguis vere singularis constat viginti marcis Germanicis.

Societas Latina
Universität - FR 6.3
D - 66041 Saarbrücken