Lingua quaelibet, quae non iam est in usu, vix erit superstes tamquam usualis, quamvis ingens copia litterarum et litteraturae permultorum saeculorum exstet mirum in modum ampliata haud difficulter accessibilis. Haec est etiam sors condiciove linguae Latinae. Hanc ob causam hoc opus collecticium sive collectivum susceptum est proponendum, ubi de elementis quaestionibusque circumspecte diserteque agitur, quae spectant ad hodiernum recentissimumque usum linguae Latinae sive prudenter recuperandum sive necessario exercendum.

Itaque hoc volumine sýmbolae continentur dispersim divulgatae, sed denuo retractatae atque, ubi necessarium id videbatur, auctae et amplificatae. Nam agitur de vocabulorum usu, de verbis temporalibus convenientissime novandis, de accentibus Latinis etiam vocabulorum Graecanicorum (velut aeroplani) et nominum Hebraicorum, de nominibus dierum hebdomadalium, de horologiorum horis indicandis, de numeris annorum adhibendis, de compluribus aliis quaestionibus et rebus, quae spectant ad indigentias temporis nostri contemporanei.

Idcirco diligentissime et comprehensive in rationes neologismorum congruenter condendorum et creandorum inquiritur, ubi de novis instrumentis generis diversi denominandis agitur similiterque de machinis recentissimis designandis, verum etiam de non paucis subtilitatibus differitatibusque vitae scientiaeque modernae.

Denique cuncta testimoniis satis multis satisque validis confirmantur et comprobantur, quo fiat, ut recens sermo Latinus normis regulisve antiquis sit conformis insuperque condicionibus modernis cognoscatur esse satis habilis.

Hic liber 534 (= XIV + 520) paginarum in Saravipontana sede "Societatis Latinae" venalis prostat pretio quadraginta unius marcarum, cuius inscriptio cursualis est haec:

Societas Latina
Universität des Saarlandes - FR 6.3
D-66041 Saarbrücken